Azərbaycan Kommunist Partiyası Mərkəzi Komitəsində 1941-1945-ci illər müharibəsində arxa cəbhədə fəallıqları ilə seçilən insanlara həsr olunmuş "Qələbənin yaşıdları" adlı tədbir keçirilib. Tədbirdə Azərbaycan KP MK-nın birinci katibi Ədalət Abdinov çıxış edərək bildirib ki, tarixin bütün dövrlərində Azərbaycanın mərd oğul və qızları xalqımıza məxsus olan fədakarlıq, vətənpərvərlik kimi ən ali keyfiyyətləri ilə seçiliblər. 1941-1945-ci illər müharibəsində cəbhəyə yollanan və arxa cəbhədə fəallıqları ilə seçilən azərbaycanlılar müharibədə yaxından iştirak edərək tarixi qələbənin qazanılmasına öz töhfələrini veriblər. Azərbaycan Respublikasında müharibə və arxa cəbhə veteranlarına göstərilən dövlət qayğısı bu gün sosial siyasətin əsas istiqamətlərindən biridir. Əmək pensiyaları və müavinətlərin artırılması, hər il 9 May – Qələbə Günü münasibətilə birdəfəlik müavinətlərin verilməsi, minik avtomobilləri ilə təminat, mənzil-məişət şəraitinin yaxşılaşdırılması veteranlara dövlət tərəfindən göstərilən diqqətin nəticəsidir.
Ədalət Abdinov qeyd etmişdir ki, Azərbaycan Kommunist Partiyası Mərkəzi Komitəsində də döyüşlərin ağır və çətin sınaqlarından keçən müharibə və arxa cəbhə veteranlarının vətənpərvərliyi Vətənə xidmət nümunəsi kimi hər zaman yüksək qiymətləndirilir. Azərbaycan KP MK-nın bürosunun qərarı ilə təsdiq edilən “1941-1945-ci illər müharibəsində qələbənin 71 illik yubileyinin qeyd olunması üzrə Tədbirlər Planı”na uyğun olaraq, rayon və şəhər partiya komitələrində müvafiq işlər görülür.
Ədalət Abdinov daha sonra bildirmişdir ki, alman faşizmi üzərində qazanılmış qələbədən bizi 71 illik bir zaman məsafəsi ayırır. Bu qələbənin qazanılmasında ön cəbhədə şücaət göstərən soydaşlarımızla bərabər, arxa cəbhədə fədakar əməyi ilə döyüşə köməklik göstərənlər də az olmayıb.
Tədbirdə çıxış edənlər - Qələbəmizin yaşıdları Ənvər Babayev, Akif Əsədov, Firudin Əşrəfov faşizm üzərində tarixi müvəffəqiyyətin qazanılmasında digər xalqlar kimi, azərbaycanlıların da göstərdikləri misilsiz igidlik və qəhrəmanlıqları qeyd etmişlər, respublikamızın bu dəhşətli müharibədə təkcə canlı qüvvə ilə deyil, təbii resursları ilə də iştirak etdiyini xatırlamışlar.
Ənvər Babayev dedi ki,tarixən Azərbaycanın mərd oğul və qızları xalqımıza məxsus olan fədakarlıq, vətənpərvərlik kimi ən ali keyfiyyətləri ilə seçilmişlər. Onlar bu keyfiyyətləri 1941-1945-ci illər müharibəsində də göstərmiş, faşizm üzərində qələbə qazanılmasında fəal iştirak etmişlər. Xalqımızın mərdliyinin və igidliyinin ifadəsi idi ki, minlərlə azərbaycanlı dəhşətli müharibənin başlandığı ilk gündən döyüş cəbhəsinə yollanmışdı. Arxa cəbhədə qalanlar isə yaşlı kişilər, qadınlar və yeniyetmələr idi. Onlar döyüşə gedənləri əvəz etmək üçün bütün qüvvələri ilə çalışırdılar. Bu da qanlı-qadalı döyüşlərdə vuruşan, qələbə əzmi ilə düşmənə ciddi zərbələr vuran igid eloğullarımıza mənəvi dəstək idi.
Akif Əsədov qeyd etdi ki, 1941-1945-ci illər müharibəsində keçmiş SSRİ-nin tərkibində olan digər müttəfiq respublikalar kimi, Azərbaycanın da minlərlə oğul və qızı istər döyüşən orduda, istərsə də arxa cəbhədə misilsiz döyüş və əmək rəşadəti nümayiş etdirmişdir. Azərbaycanlılardan ibarət 416-cı, 336-cı, 402-ci, 271-ci, 77-ci və 223-cü milli diviziyalarımız Qafqazdan Berlinədək şərəfli döyüş yolu keçdiyi kimi, xalqımız arxa cəbhədə də ordunu müxtəlif döyüş ləvazimatları, geyim, ərzaqla təmin etmək üçün fədakarlıq nümunəsi göstərmişdir.
Firudin Əşrəfov bildirdi ki, ölkəmizin paytaxtı Bakı şəhərində, əsasən, neft məhsulları, hərbi sursat istehsal olunurdu. O vaxt Bakı ölkə neftinin 70 faizini verirdi. Azərbaycan kommunistlərinin lideri olmuş Heydər Əliyevin sözləri ilə desək, “Əgər Bakının nefti olmasaydı, sovetlər ittifaqının qələbəsi mümkün deyildi”. Digər bölgələrimizdə insanlar döyüşən ordunu ərzaqla, geyimlə təmin etmək üçün var qüvvələri ilə çalışırdılar.
Tədbiri yekunlaşdıran Ədalət Abdinov demişdir ki, 1941-1945-ci illər müharibəsi dövründə arxa cəbhədəki vətəndaşlarımız, əmək qabiliyyətli bütün insanlar “Hər şey cəbhə üçün, hər şey qələbə üçün” şüarı altında cəbhədə vuruşanları ərzaqla, silahla, geyim ləvazimatları ilə təmin etməyi özlərinin vətəndaşlıq borcu saymışlar. Bu gün döyüşçülərimizlə yanaşı arxa cəbhədə fədakarlıq göstərənlərin əməyini, zəhmətini də iftixarla qeyd edirik.
Azərbaycan Kommunist Partiyasının mətbuat xidməti
Если у Вас еще нет аккаунта на нашем портале, Вам необходимо зарегистрироваться.