ƏDALƏT ABDİNOV: SABİRABAD MÜŞAVİRƏSİ SOVET TƏSƏRRÜFAT ƏNƏNƏLƏRİNİN UĞURLU DAVAMIDIR

Prezident İlham Əliyevin sədrliyi ilə 17 sentyabr 2016-cı ildə Sabirabad rayonunda pambıqçılığın inkişafı məsələlərinə dair keçirilmiş respublika müşavirəsində sovet təsərrüfat ənənələrinə maraq hiss olunmuşdur.   Azərbaycanda kommunist hərəkatının öncülü  Ədalət Abdinov bu barədə "mastersmi.com" saytına açıqlamasında bildirmişdir. Partiya rəsmisi sovet təsərrüfat ənənələrinə yaxınlığı ilə seçilən məlum müşavirə ilə bağlı fikrini belə ifadə etdi:

- Azərbaycan Respublikasının Prezidenti İlham Əliyev həmin  müşavirədə söylədiyi nitqini bu sözlərlə başladı: “ Bu müşavirənin Sabirabad rayonunda keçirilməsi təsadüfi deyil. 1970-ci illərdə, 1980-ci illərin əvvəllərində ulu öndər Heydər Əliyev Sabirabadda hər il zona müşavirəsi keçirirdi. Pambıqçılıqla bağlı o müşavirələrdə çox dəyərli göstərişlər verilirdi. Bu ənənəyə sadiq olaraq mən pambıqçılığın inkişafı ilə bağlı birinci ümumrespublika müşavirəsinin keçirilməsi üçün də Sabirabad rayonunu seçdim”.  

Bəli, Preziden İlham Əliyev tamamilə düzgün mövqe tutub. Ötən əsrin 70-80-ci illərində Sovet Azərbaycanında kənd təsərrüfatı, o cümlədən pambıqçılıq sürətli inkişaf yolu keçir,  Sovet Sabirabadı isə demək olar ki,  pambıqçılığın təcrübə məktəbi idi. Həmin illərdə kənd təsərrüfatındakı  misilsiz  qələbələr  rəhbəri Heydər Əliyev olan Azərbaycan Kommunist Partiyasının yüksək təşkilatçılığı sayəsində mümkün olmuşdur. Azərbaycan Kommunist Partiyasının kənd təsərrüfatı, o cümlədən pambıqçılıq sahəsində SSRİ-də nümunə olan uğurları ənənə halını almışdır. Bütün bunları çox yaxşı bilən və yüksək qiymətləndirən İlham Əliyev özünün dediyi kimi “Bu ənənəyə sadiq olaraq mən pambıqçılığın inkişafı ilə bağlı birinci ümumrespublika müşavirəsinin keçirilməsi üçün  Sabirabad rayonunu seçdim”.

Tam əminliklə deyirəm, ki, Azərbaycan Kommunist Partiyasının qurduğu sovet iqtisadiyatının təcrübəsindən istifadə etməklə İlham Əliyev müstəqil ölkəmiz üçün misilsiz nailiyyətlər əldə edə bilər. Özünün qeyd etdiyi kimi “ Sabirabad rayonunda və bütün başqa pambıq əkilən rayonlarımızda pambıqçılığın bərpası işi sürətlə gedəcək, biz pambıqçılığın şöhrətini bərpa edəcəyik. Bu, həm insanlar, həm dövlət üçün böyük gəlir gətirən bir sahədir”.

İlham Əliyev qaynar, çoşğun sovet təsərrüfat həyatını da unutmayıb və o illəri fəxrlə xatırlayır: “1970-1980-ci illərdə Ulu Öndər Sabirabada və pambıqçılıqla məşğul olan digər rayonlara səfər edərkən məni də özü ilə aparırdı. Mən də o illərdə dəfələrlə onunla bərabər Sabirabadda olmuşam, o müşavirələrdə iştirak etmişəm. Pambıq tarlalarında, tarla düşərgələrində pambıqçılarla görüşü zamanı onunla bərabər olmuşam. Yəni, o xatirələr mənim ürəyimdə yaşayır və bu gün daha da aydın görünür ki, ulu öndər Heydər Əliyev nə qədər uzaqgörən və xalqa bağlı olan bir insan idi. Çünki o, yaxşı bilirdi ki, pambıqçılığın Azərbaycanın müttəfiq respublika kimi inkişafında və Azərbaycan vətəndaşlarının rifah halının yaxşılaşdırılmasında çox mühüm yeri var”.

Təkcə pambıq istehsalında Sovet Azərbaycanı ilə indiki kapitalist Azərbaycanın fərqi nədir? Prezident Ilham Əliyevin narahatlıqla qeyd etdiyi fikirlər bu fərqi tam izah edir:  “ Əgər Ulu Öndərin yorulmaz səyləri və zəhmətkeşlərin böyük fədakarlığı nəticəsində 1970-80-ci illərdə bir milyon ton pambıq tədarük edilirdisə, keçən il cəmi 35 min ton yığılıb. Əgər o illərdə 300 min hektarda pambıq əkilirdisə, keçən il cəmi 18 min hektarda pambıq əkilib. Bu, nə deməkdir?! Bu, pambıqçılığın məhvi deməkdir.  Bu, dözülməzdir...”.

İlham Əliyev bu günkü kapitalizm şəraitində səmimi etraf edir ki,  pambıqçılıq Azərbaycanda tənəzzülə uğrayıb. Əlbəttə, bunun obyektiv və subyektiv səbəbləri olduğunu da qeyd edir. Prezidentin bu səmimi fikirlərini Azərbaycan xalqı, o cümlədən kommunistlər çox yüksək qiymətləndirirlər: ”Hesab edilirdi ki, biz bazar iqtisadiyyatı şəraitində yaşayırıq və bazar iqtisadiyyatı hər şeyi tənzimləyir, hər şeyi yoluna qoyur. Ancaq həyat göstərir ki, bu, belə deyil”.

Bəli, bu doğrudanda belə deyil.  İlham Əliyev haqlı olaraq xalqa bəyan edir ki,  “Bazar iqtisadiyyatı heç də o demək deyil ki, hər şey yolunda olacaq”. Fakt göz qabağındadır,  Prezidentin dediyi kimi  “Pambıqçılığın tənəzzülə uğraması bunun bariz nümunəsidir”. Biz  kommunistlər də ölkə başçısınin dediyi:  “Dövlət kənd təsərrüfatın inkişafına həm daha da güclü dəstək verməlidir, həm də bu sahəyə daha da böyük miqyasda müdaxilə etməlidir”,  fikrini  tam gücümüzlə dəstəkləyirik. Məhz sovet iqtisadi təcrübəsi olan  bu  yolla respublikamızda  ənənəvi olan, ancaq əfsuslar ki, tənəzzülə uğrayan sahələri bərpa  və inkişaf etdirmək mümkündür.

Ölkə başçısının sovet vaxtının xatırlaması başa düşüləndir: “O vaxt ümumittifaq xalq təsərrüfatı bölgüsü aparılırdı. Bəzi respublikalarda heyvandarlıq, taxılçılıq inkişaf edirdi. Azərbaycanda isə  üzümçülük, pambıqçılıq, tütünçülük, çayçılıq, baramaçılıq və digər sahələr inkişaf edirdi. Sovet İttifaqı dağılandan sonra respublikalararası əlaqələr də kəsildi və beləliklə, biz çətin bir vəziyyətlə üzləşmişdik.”.

Sovet dövründə qazanılan uğurların bir səbəbə də o idi ki, ciddi  ictimai nəzarət var idi. Bu gün çox haqlı olaraq həmin ictimai nəzarəti Prezident İlham Əliyev də tələb edir: “ Dövlət orqanları, yerli orqanlar və ictimaiyyət tərəfindən çox ciddi nəzarət olmalıdır. Mən dəfələrlə demişəm ki, ictimai nəzarət Azərbaycanda güclü olmalıdır. İctimai nəzarət, yəni, vətəndaşların nəzarəti güclü olarsa, onda biz bu işləri daha da böyük uğurla həll edə bilərik”.

Sovet dövrünün ən gözəl xüsusiyyətlərindən biri də o idi ki, qabaqcıl əmək adamları, istehsalatda uğurlar qazanan zəhmətkeşlər müxtəlif orden və medallarla təltif olunurdu. Prezident İlham Əliyev də müşavirədə əmək nailiyyətləri qazanan insanların orden və medallarla təltif edilməsinin vacibliyini vurğulayıb: “Hesab edirəm ki, biz bu ənənəni bərpa etməliyik. Göstəriş verirəm, Prezident Administrasiyası bu məsələ ilə bağlı öz təkliflərini mənə təqdim etsin. “Əmək” ordeninin bir neçə dərəcəsi ola bilər. Əgər yaxşı nəticələr olsa, birinci ordeni biz pambıqçılara təqdim edə bilərik”. 

Prezident İlham Əliyev müşavirədə sovet dövrünün görkəmli pambıqçısı,  Sosialist Əməyi Qəhrəmanı Fatma  Hüseynovanın briqadasında olmasını da sovet dövrünü yaşamış sadə insanlarda böyük inam və ruh yüksəkliyi yaratmışdır.