Ədalət Abdinov, Azərbaycan Kommunist Partiyası Mərkəzi Komitəsinin birinci katibi
Müasir imperialist irticasının başlıca ideya – siyasi silahı antisosializmdir. Əsas məzmunu sosializm quruluşuna böhtan atmaqdan, kommunist partiyalarının siyasət və məqsədlərini, marksizm – leninizm təlimini saxtalaşdırmaqdan ibarətdir. Antisovetizm, keçmiş SSRİ-nin iqtisadi, siyasi və mədəni sahələrdəki nailiyyətlərinə göz yummaq və onları təhrif etmək cəhdi antisosializmin başlıca məqsədidir.
Antisosializm marksizmin meydana gəlməsi ilə bir zamanda, ona düşmən ideologiya kimi yaranmış, sosializmin dünya sisteminə çevrilməsi ilə daha da mürtəceləşmişdir. Antisosializm əsasən üç sahədə (iqtisadi, siyasi və ideoloji) özünü göstərir. Antisosializmin nümayəndələri keçmiş SSRİ və digər sosialist ölkələrinin iqtisadi sistemlərinin sosialist xarakterini inkar edir, bu ölkələrin iqtisadiyyatını dövlət kapitalizmi kimi qələmə verməyə çalışır; siyasi sahədə sosialist dövlətlərinin “totalitar” xarakteri, dünya kommunist hərəkatının təcavüzkar mahiyyəti haqqında böhtanlar uydurur; ideoloji sahədə - sosializm cəmiyyətində təfəkkürün, mənəvi sərvətlərin “standartlaşdırılması”, şəxsiyyətin “rəhbərliyinin” bu və ya digər göstərişlərini yerinə yetirən adi vasitəyə çevrilməsi, elmi kommunizm ideologiyasının utopizmi haqqında cəfəng şayiələr yayırlar. İmperialist irticası qabaqcıl və inqilabi nə varsa hamısını təqib edir, zəhmətkeşlərin sıralarını parçalamağa, işçi sinifin mübariz iradəsini zəiflətməyə çalışır.
Antisosializm burjua ideologiyasının son dərəcə tənəzzülə uğradığını əks etdirir. Kapitalist ölkələrində cəmiyyətin müxtəlif təbəqələrinə məxsus daha çox adam antisosializmin çürüklüyünü getdikcə daha aydın başa düçür. Irtica mümkün olan hər yerdə əks – hücumlara keçməyə, gərginliyin zəifləməsi işini ləngitməyə, vaxtı çatmış problemlərin həllini mürəkkəbləşdirməyə çalışır, hadisələrin gedişini doğru işıqlandırmır, köhnəlmiş antisovetizm mövqeyinə əl atır.
Antisosializm yalnız ideologiya deyil, həm də imperialist dövlətlərinin mürtəce dairələrinin kommunist, fəhlə və milli hərəkatını boğmağa yönəldilmiş real siyasət xətti kimi çıxış edir. Burjua ideologiyasının bəzi nümayəndələri “pozitiv” antisosializm yaratmağa çalışırlar. “Pozitiv” antisosializm ictimai nəzəriyyənin inkişafında marksizm – leninizm klassiklərinin elmi xidmətlərini, marksizmin və sosializm cəmiyyətinin ayrı – ayrı cəhətlərinin müsbət əhəmiyyətini etiraf etməklə yanaşı, əsas diqqəti elmi kommunizmin “immanent” tənqidinə verir, inkişaf etmiş “sənaye” cəmiyyətində qarşıya çıxan problemlərin həlli üçün marksizm – leninizmin köhnəldiyini, yaramadığını sübut etməyə çalışır.
Sağ sosial – demokratiya da bu mövqedən çıxış edir. Sosial – demokratlar arasında özlərinin bütün fəaliyyətini antisosializm və antisovetizm üzərində quranlar az deyildir. Özlərini “sovetoloq” adlandıran bəzi burjua alimləri sosializmin tənqidinə bir növ “kerçək” xarakter vermək üçün sosializmin nəzəriyyə və təcrübəsini daha dərindən öyrənməyi tələb edirlər.
Kommunistlər müasir burjua ideologiyasının və siyasətinin bütün sahələrində özünü göstərən antisosializmə qarşı amansız mübarizə aparırlar. İndiki şəraitdə ideoloji mübarizə problemləri ketdikcə daha ön sıraya keçir, sosializm haqqında həqiqət isə bu mübarizədə güclü silahdır. Vaxtilə sosializm sistemi ölkələrinin nailiyyətləri, sülh və demokratiya uğrunda kapitalist ölkələrinin özündə genişlənən mübarizə antisosializmin iflasının labüdlüyünü göstərir.
Если у Вас еще нет аккаунта на нашем портале, Вам необходимо зарегистрироваться.