Kommunist tərbiyəsi müasir dövrün ən əktual məsələlərindən biridir. Vaxtilə SSRİ-də 1919-cu ildən fəaliyyət göstərən İctimai Tərbiyə Akademiyası əsasında yaranmış N.K.Krupskaya adına Kommunist Tərbiyəsi Akademiyası (1923-1935) fəaliyyət göstərirdi. Bu akademiyaya orta təhsilli və xalq maarifi sahəsində təcrübəsi olan kommunist və komsomolçular qəbul edilirdilər. Təhsil müddəti 4 il idi. 1927-ci ildə Kommunist Tərbiyəsi Akademiyası yanında maarif işçilərinin ixtisasını təkmilləşdirən axşam pedaqoji universiteti yarandı. Kommunist Tərbiyəsi Akademiyasında N.K.Krupskaya və başqa görkəmli maarif xadimləri dərs deyirdilər. 1934-cü ildə Kommunist Tərbiyəsi Akademiyası Leninqrada köçürülmüş, 1935-ci ildə N.K.Krupskaya adına Kommunist Pedaqoji İnstitutuna çevrilmiş, 1941-ci ildə A.İ.Gertsen adına Leninqrad Pedaqoji İnstitutu ilə birləşdirilmişdir.
Sosializm quruculuğu prosesində şəxsiyyətin planlı, məqsədyönlü və müntəzəm formalaşması, hərtərəfli inkişafı elmi kommunizm nəzəriyyəsinin tərkib hissəsi olan kommunist tərbiyəsində ehtiva olunur. Marksizmədək şəxsiyyətin hərtərəfli inkişafına dair vahid elmi nəzəriyyə yox idi. Kommunist tərbiyəsi nəzəriyyəsinin elmi əsasını K.Marks, F.Engels və V.İ.Lenin qoymuşdur. Marksizm – leninizm klassikləri tərbiyənin sinfi – tarixi mahiyyətini müəyyən etmiş, insanların tərbiyəsinin ictimai münasibətlərdə və onların bu prosesdə fəal iştirakında görmüşlər. Kommunizm cəmiyyəti adamlarını tərbiyə etməyin başlıca prinsipini – təlimin əməklə vəhdətini əsaslandıran K.Marks və F.Engelsin kommunist tərbiyəsi haqqında təlimini V.İ.Lenin inkişaf etdirmişdir. V.İ.Lenin yazmışdır ki, kommunizm quruculuğu “…hərtərəfli inkişaf etmiş və hərtərəfli hazırlanmış adamlar, hər işi görə bilən adamlar tərbiyə etməyə, öyrətməyə və hazırlamağa...” gətirib çıxaracaqdır. “Kommunizm buna doğru gedir, getməlidir və gəlib buna çatacaqdır…” (Əsərləri, c.31, səh.35).
Kommunist tərbiyəsi adamların sosializm quruculuğunda fəal iştirakı ilə əlaqədar olan yaradıcı prosesdir. Azərbaycan Kommunist Partiyasının Proqramında sosializm qurucusunun əxlaq kodeksi öz əksini tapmışdır. Ateist, estetik, fiziki tərbiyə sistemləri kommunist tərbiyəsinin mühüm tərkib hissələridir. Tərbiyə işi özünütərbiyəni də nəzərdə tutur. Yeni insanın formalaşması sosializmin maddi-texniki bazasının yaradılması və sosial-ictimai münasibətlərin təkmilləşib tədricən sosialist ictimai münasibətlərinə çevrilməsi ilə sıx əlaqədə baş verəcəkdir. Əmək kollektivi yeni insanın formalaşması, adamlar arasında kommunist münasibətlərinin yaranması üçün mühüm amildir.
V.İ.Lenin hərtərəfli inkişaf etmiş insanın tərbiyəsində politexnik təlimin başlıca rol oynadığını göstərmişdir. Böyüməkdə olan nəslin kommunist tərbiyəsi – mənəviyyatca zəngin, ideyaca mətin, yüksək əxlaqlı şəxsiyyətin formalaşdırılması kompleks problemdir və onun həllində, ancaq sovet məktəbi mühüm rol oynaya bilər. Məktəbdə insanın dünyagörüşünün bünövrəsi qoyulur, onun xarakteri formalaşır, məktəblilərlə kommunist əqidəliliyi, əməyə məhəbbət, yüksək mənəviyyat və humanizm, vətənpərvərlik və beynəlmiləlçilik kimi zəruri keyfiyyətlər tərbiyə edilir. Respublika vətəndaşlarının kommunist tərbiyəsi prosesində rəhbər və istiqamətverici qüvvə Azərbaycan Kommunist Partiyasıdır.
Kommunist tərbiyəsində sosial şəbəkədən, partiya maarifi sistemindən, mədəni-maarif müəssisələrdən, müstəqil mətbuat, radio və televiziyadan səmərəli istifadə olunmalıdır. Son illər geniş yayılmış kommunist ədəbiyyatı kommunist tərbiyəsi prosesində mühüm əhəmiyyətə malikdir. Yeri gəlmişkən, “Fəal həyat mövqeyinin formalaşdırılması: mənəvi tərbiyənin təcrübəsi və aktual problemləri” mövzusunda 1979-cu il aprelin 25-27-də Bakıda keçirilmiş Ümumittifaq elmi-praktik konfransın materialları kommunist tərbiyəsi işinin təşkili prosesində bu gün də aktualdır. Heydər Əliyevin sözləri ilə desək: “… ideoloji fəaliyyətin ən mühüm problemlərinin nəzəri cəhətdən zənginləşdirilməsi üçün yaxşı bir məktəb oldu” (Əliyev H.Ə., Konfransda nitqi, “Azərbaycan kommunisti”, 1979, № 5, səh.47-48).
Azərbaycan Kommunist Partiyasının “İdeoloji işi və siyasi tərbiyə işini daha da yaxşılaşdırmaq haqqında” qərarında (2015, iyun), Azərbaycan Kommunist Partiyasının VI plenumunda ( 24 yanvar, 2016) ölkə vətəndaşlarını yüksək ideyalılıq, sosializm uğrunda mübarizə, ictimai mülkiyyətin bərqərar olması ruhunda tərbiyə etmək, burjua baxışlarını və mənəviyyatını rədd etmək, şəxsiyyətin hərtərəfli, ahəngdar inkişaf etdirmək üçün geniş tədbirlər proqramı müəyyənləşdirmişdir.
ƏDALƏT ABDİNOV,
Azərbaycan Kommunist Partiyası Marksizm-Leninizm Universitetinin rektoru
Если у Вас еще нет аккаунта на нашем портале, Вам необходимо зарегистрироваться.